हाती जपाची माळ घ्यावी ..

हाती जपाची माळ घ्यावी, नामस्मरण करावे ..
नेमाने त्या विधात्याचे, नाम मुखी भजावे ..

तोच देता तोच घेता, आठव त्याची व्हावी ..
जात्यावर जशी बसल्या वरती, ओवी सहज सुचावी ..
विचार चिंता दुसरे तेंव्हा, मनांत कांही नसावे ..
नेमाने त्या विधात्याचे, नाम मुखी भजावे ..

जप जाप्याने मिळते ऊर्जा, आणि शक्ती अमाप ..
संचय त्याचा सहजी जाणवे, कुणाही आपोआप ..
अनुष्ठान हे प्रत्येकाच्या, घरोघरी असावे ..
नेमाने त्या विधात्याचे, नाम मुखी भजावे ..

व्यथा कितीही अवती भवती, प्रत्येकाच्या असती ..
मुखी नाम ते घेता सार्या, क्षणार्धात विरघळती ..
तेजाने नामाच्या पुरते, जीवन उजळुन जावे ..
नेमाने त्या विधात्याचे, नाम मुखी भजावे ..

हाती जपाची माळ घ्यावी, नामस्मरण करावे ..
नेमाने त्या विधात्याचे, नाम मुखी भजावे ..

विजय साठे ..

आई तुझी आठवण .. 

आई तुझी आठवण, मनातील साठवण,
एकसारखी मला जाणवते ..
संस्कारांची शिकवण, पालन आणि पोषण,
वेळो वेळी मला आठवते ..

बालपणी चे ते क्षण, शिस्तीचे ते जीवन,
आजही मजला ते जागवते ..
यौवनातले ते मन, सुन्दर ते सहजीवन,
राहुन राहून मला ते स्मरते ..

कांहीं वेळी हसतांना, कांही वेळी रडतांना,
सावरणे तुझे मला ते दिसते ..
हांक तुला मारता, नाहीस तू आई आता,
कमतरता हीच किती सतविते ..

आई तुझी आठवण, मनातील साठवण,
एकसारखी मला जाणवते ..

विजय साठे ..
२२ / ११ / २०१४ 


  

फांदीवरी चिमणी पहा .. 

फांदीवरी चिमणी पहा, त्या चिमुकल्यांना भरवते ..
एकेक दाणा भरवुनी, ती कशी पहा त्यां जगवते ..

घरट्यातली पिल्ले रहाती, चोची अपुल्या उघडुनी ..
नक्कीच येईल पाणी दाणा, हीच खात्री ठेऊनी ..
माय ती येऊन जाऊन, भूक त्यांची शमविते ..
एकेक दाणा भरवुनी, ती कशी पहा त्यां जगवते ..

जिव्हाळ्याचे हे किती, नाते अतुट निर्मळ असे ..
बिलगता आईस पिल्ले, रम्य हे किती तरी दिसे ..
कष्ट करुनी माय ती, अपुल्या पिलां जोपासते ..
एकेक दाणा भरवुनी, ती कशी पहा त्यां जगवते ..

दिवस सरती होत जाती, मोठी तिची पिल्ले पहा ..
भुरभूर उडुनी जाती सारी, दिशांना ती त्या दहा ..
घरट्या मधे ती एकटी मग, वाट त्यांची पाहते ..
एकेक दाणा भरवुनी, ती कशी पहा त्यां जगवते ..

कां अशी ही वेळ तिज वर, यावी कुणी सांगेल का ..
काय चुकले आज वर, समजावुनी देईल का ..
दुःख वाटे किती मनी, पाहून द्रावक चित्र ते ..
शिदोरी वर आठवणींच्या, एकटी ती चालते ..

एकटी ती चालते ..

विजय साठे ..
०४ / १२ / २०१४ 

पूर्वेला आसमंती

पूर्वेला आसमंती, जशी पहाट जागली ..
कवेतली निशा तेंव्हा, लपुन छपुन निसटली ..

पहाटेचा रंग रंग, होता छान लाजरा ..
आकाशाच्या पाठीवर खूप दिसे साजरा ..
छाप त्याची लगोलगी, मनावरी उमटली ..
पूर्वेला आसमंती, जशी पहाट जागली ..

पूर्वरंग शैशवाचा, नाजुकसा भासला ..
आकाशाच्या भालावरी, भरा भरा साठला ..
खेळ त्याचे पाहुनी, नजर ही सुखावली ..
पूर्वेला आसमंती, जशी पहाट जागली ..

गालावरी लाली जशी सुंदरशी उमटली ..
गोड गुलाबी तशीच आकाशी दाटली ..
आठवणींच्या कुशीत, सहजी सामावली ..
पूर्वेला आसमंती, जशी पहाट जागली ..

पूर्वेला आसमंती, जशी पहाट जागली ..
कवेतली निशा तेंव्हा, लपुन छपुन निसटली ..

विजय साठे .. 
०२ / ११ / २०१४ 

    

आनंदाने जगा जरा

मजा करा मजा करा, दुःखाना क्षणभर विसरा ..
आनंदाने जगा जरा, हाच सुखाचा मार्ग खरा ..

कोणीही नसतो सुखी इथे, दुःख ही कोणा ना चुकते ..
मन ही या मधे भरकटते, चित्त त्या मुळे स्थिर नसते ..
शांत मनाने, जन हो आता, विचार याचा म्हणुन करा ..
आनंदाने जगा जरा, हाच सुखाचा मार्ग खरा ..

जरी असती दिसती नाती, घडी संकटी खरी कळती ..
क्षणार्धात ती विरघळती, तेंव्हा त्यांची ये प्रचीती ..
दूर दृष्टीने, मंडळी आता, ध्यानी मनी हे तुम्ही धरा ..
आनंदाने जगा जरा, हाच सुखाचा मार्ग खरा ..

नात्यांच्या ही पलीकडले, पाहिजेच आता घडले ..

प्रत्येकाला नवीन स्नेही, इथे पाहिजे सापडले ..

शोधक नजरेने मित्र हो, अव्याहत हां शोध करा ..

आनंदाने जगा जरा, हाच सुखाचा मार्ग खरा ..

नव नाती ही अशी जोडुनी, आनंदी क्षण वाढावे .. 

ज्याला जैसे जमेल त्याने याचे वाटेकरी व्हावे ..

मने मिळवुनी, सारे मिळुनी, चांदण्यात या फिरू जरा ..

आनंदाने जगा जरा, हाच सुखाचा मार्ग खरा ..

मजा करा मजा करा, दुःखाना क्षणभर विसरा ..
आनंदाने जगा जरा, हाच सुखाचा मार्ग खरा ..

विजय साठे ..

३० / १० / २०१४      

मारुती राया अंजनी सुता .. 

मारुती राया, अंजनी सुता, श्रेष्ठ तुझा हा मान ..
बोला सारे, मिळुन संगती, जय जय हनुमान ..

झेप घेऊनी, गगनी जासी, सूर्याला तू धराया ..
घाबरु लागे, धरणी आणि, आसमंत कंपाया ..
सेवक असण्या श्रीरामांचा, किती तुला अभिमान ..
बोला सारे, मिळुन संगती, जय जय हनुमान ..

महाबली तू, सौख्यकारी तू, असशी भाग्यविधाता .. 

दीननाथ तू, लोकनाथ तू, असशी रे, पुण्यवंता ..

भक्तगणांच्या, मनांत राही, जेष्ठ तुझे रे स्थान .. 

बोला सारे, मिळुन संगती, जय जय हनुमान ..

भीमरूप तू, महाबली तू, अफाट तुझी रे शक्ती ..

छाती फाडून, देसी दाखवुन, श्रीरामा प्रति भक्ती .. 

रामरूपी तू, संकटमोचक, असशी शक्ती स्थान ..

बोला सारे, मिळुन संगती, जय जय हनुमान ..

मारुती राया, अंजनी सुता, श्रेष्ठ तुझा हा मान ..
बोला सारे, मिळुन संगती, जय जय हनुमान ..

विजय साठे ..
२४ / १० / २०१४ 

  

रूपेरी, चंदेरी, सोनेरी, राती .. 

रूपेरी, चंदेरी, सोनेरी, राती ..
रोज रोज येती, आणि, पटा पटा जाती ..

दिवसाचा हातामधे, घेऊनिया हात ..
रात शिरे घरोघरी, हलके झोकांत ..
राहती प्रेमात तिथे, सर्वांच्या सांगाती ..
रूपेरी, चंदेरी, सोनेरी, राती ..

पाहत असती कोणी, वाट रात होण्याची ..
कोणी वाट पाहती, निशा इथे सरण्याची ..
कुणीही असो सार्यांची, रात असे सांगाती ..
रूपेरी, चंदेरी, सोनेरी, राती ..

रातीच्या साथीने, नवजीवन उमलते ..
सहजीवन संगतीने, रातीच्या बहरते ..
राती सवे, सहजी जुड़ती, स्नेहांकित नाती ..
रूपेरी, चंदेरी, सोनेरी, राती ..

विजय साठे ..
२२ / १० / २०१४ 

वाट पाही देव राऊळी ..

वाट पाही देव राऊळी, किती दीस झाले ..
म्हणे, भक्त अजुन कसे ना, भेटण्यास आले ..

विटेवरी उभा इथे मी, असे चारी प्रहर ..
कुठेही न जाता ठेवी, भक्तांवर नजर ..
समीप जे सहजी आले, ते माझे झाले ..
वाट पाही देव राऊळी, किती दीस झाले ..

वारकरी हे संबोधन, सार्या भक्तांना ..
तमा नसती बाळगती ते, भेटीस येतांना ..
आशिष पाठीशी त्यांच्या, जे जे कुणी आले ..
वाट पाही देव राऊळी, किती दीस झाले ..

उन्हाळा हिवाळा गेला, येई आता वर्षा ..
आतुर किती देव असे तो, भक्तांच्या स्पर्शा ..
अधीर होत तो ही विचारी, भक्त कुठे गेले ..
वाट पाही देव राऊळी, किती दीस झाले ..

वाट पाही देव राऊळी, किती दीस झाले ..
म्हणे, भक्त अजुन कसे ना, भेटण्यास आले ..

विजय साठे ..

करू या फेका फेक़ी 

करू या फेका फेक़ी, गंमत येईल भारी ..
वेदना हरवुनी जातील, अन हसेल दुनिया सारी ..

फणसाच्या झाडाला, लागेल टमाटर जेंव्हा ..
घड केळ्याचा येईल, जमिनीच्या खाली तेंव्हा ..
किती मजा ही येईल, खाताना त्यांना भारी ..
वेदना हरवुनी जातील, अन हसेल दुनिया सारी ..

मासे आकाशी उडतील, अन जलाशया मधी प्राणी ..
पक्षी भूमीवरी फिरतील, अन साप ही गातील गाणी ..
किती मजा ही येईल, घडताना हे शेजारी ..
वेदना हरवुनी जातील, अन हसेल दुनिया सारी ..

अवकाशांतुन येतील, त्या ऊष्ण अशा जलधारा ..
सागरतुनी उडतील, त्या मोठया मोठया गारा ..
किती मजा ही येईल, अनुभवता अशी ही न्यारी ..
वेदना हरवुनी जातील, अन हसेल दुनिया सारी ..

करू या फेका फेक़ी, गंमत येईल भारी ..
वेदना हरवुनी जातील, अन हसेल दुनिया सारी ..

विजय साठे ..
१४ / १० / २०१४

   

निसटुन गेले, जे क्षण ..  

घटका गेल्या, पळे उलटली, तास ही झटपट सरले ..
निसटुन गेले, जे क्षण कधीही, उलटुन नाही परतले ..

लहानपण जे, अत्यानंदी, भुरभुर कधीच उडाले ..
वेगही इतका, मागे धावुन, कधीही नाही मिळाले ..
केली विनवणी, तरीही कोणा, नाही अजुन गवसले ..
निसटुन गेले, जे क्षण कधीही, उलटुन नाही परतले ..

लहानपण ते, क्षणांत विरले, तरूण पण अवतरले ..
कधी पोहोचलो, गृहस्थाश्रमी, मलाही नाही समजले ..
एकांती मी, असताना मज, तरूण पण आठवले ..
निसटुन गेले, जे क्षण कधीही, उलटुन नाही परतले ..

आता झालो, वृद्ध मी किती, मजला सहजी रुचे ना ..
लेखा जोखा, मांडुन ही मज, मेळ कधीही जमे ना ..
फरक क्षणांचा, लागे मज जे, प्रवासांत विरघळले ..
निसटुन गेले, जे क्षण कधीही, उलटुन नाही परतले ..

घटका गेल्या, पळे उलटली, तास ही झटपट सरले ..
निसटुन गेले, जे क्षण कधीही, उलटुन नाही परतले ..

विजय साठे .. 
१६ / ०९ / २०१४  

कांही क्षण ..

कांही क्षण सुखाचे, कांही दुःखाचे ..
कांही क्षण मानाचे, कांही अपमानाचे ..

क्षण कांही येती आणि, क्षणांत ते जाती ..
दुःखेही सरती, क्षणांत सुखेही अवतरती ..
क्षण ज्याचे त्याचे असती, जे ते स्वतःचे ..
कांही क्षण सुखाचे, कांही दुःखाचे ..

कोणी असे निर्धन येथे, कोणी धनवान ..
कोणी असे अशक्त आणि, कोणी पहेलवान ..
वाटेकरी असती सारे, अपुल्या नशिबाचे ..
कांही क्षण सुखाचे, कांही दुःखाचे ..

कोणी असे सद्न्यानी, तर कोणी अद्न्यानी ..
कोणी जगे कलंक घेऊन, कोणी मानाने ..
किमया ही सारी घडविती, हात विधात्याचे ..
कांही क्षण सुखाचे, कांही दुःखाचे ..

कांही क्षण सुखाचे, कांही दुःखाचे ..
कांही क्षण मानाचे, कांही अपमानाचे ..

विजय साठे ..
१४ / ०९ / २०१४   

दारा वरती, हलकी टक टक ..

दारा वरती, हलकी टक टक, करुनी कुणी विचारी ..
म्हणे, मला जर, जागा दिधली, मी तुमचा आभारी ..

वाटत होता, ओळखीतला, नांव तरीही स्मरेना ..
असे कसे हे, होई याचे, कारण मज उमजेना ..
असे विलक्षण, तेजस्वी अन, मुद्रा दिसे करारी ..
म्हणे, मला जर, जागा दिधली, मी तुमचा आभारी ..

आहे मी ही, तुमच्या पैकीच, नसे कोणी मी नवा ..
धकाधकीचे, जीवन जरी ही, तरी ही मज आठवा ..
म्हणे जिथे मी, जाई देतसे, कायम तिथे उभारी ..
म्हणे, मला जर, जागा दिधली, मी तुमचा आभारी ..

सुचे ना मला त्या वेळी मी आता काय करावे
मन सांगे मज एकसारखे त्याला घरांत घ्यावे
ठरले सरती दिधली जागा अनाहुता त्या प्रहरी
म्हणे, मला जर, जागा दिधली, मी तुमचा आभारी ..

हळू हळू मग, कळले सारे, गुपीत या कोडयाचे ..
वादळ होते ते, एक छानसे, उधाण आनंदाचे ..
आनंदाच्या, संगती आता, जुड़ती मंडळी सारी ..
म्हणे, आता तो, त्या सार्यांना, मी तुमचा आभारी ..

सांगत असतो, येता जाता, दुःखी नका कुणी होऊ ..
आनंदाने, खुल्या मनाने, दुःखा वाहुन नेऊ ..
सुखी जीवनाची, गुरुकिल्ली, आहे ही खरी न्यारी ..
राहीन आता, तुम्हां संगती, मी तुमचा आभारी ..

दारा वरती, हलकी टक टक, करुनी कुणी विचारी ..
म्हणे, मला जर, जागा दिधली, मी तुमचा आभारी ..

विजय साठे ..
१३ / ०९ / २०१४
 

काय सांगू .. 

जेंव्हा कुणी, समोर माझ्या, बाटली पटकली ..
काय सांगू, तिथेच माझी, पुरती सटकली ..

आज दुपारी, डार्लिंगला मी, वेळ होती दिली ..
गेलोच नाही, वेळेवर नी, कसली भडकली ..
उभं आडव घेतल, माझी, जाम टरकली .. 
काय सांगू, तिथेच माझी, पुरती सटकली ..

कॉल आला साहेबाचा, लगेच येऊन भेट ..
केबिन मधे आत्ता मला, फायली घेऊन थेट ..
भुस्काट झालं, पुरतं कारण, बॉसची सरकली ..
काय सांगू, तिथेच माझी, पुरती सटकली ..

सटकली तर होती, वाटलं मित्रांना भेटावे ..
जड माझं डोके, त्यांच्या खांद्यावर टेकावे ..
दवा दारू घेऊन, पिऊन, कार्टी पसरली ..
काय सांगू, तिथेच माझी, पुरती सटकली ..

आलं कुणीतरी, तेंव्हा, वाजत गाजत आंत ..
येता येता पसरला तो, पुढल्या दरवाज्यात ..
तेंव्हाच कुणी, समोर माझ्या, बाटली पटकली ..
काय सांगू, तिथेच माझी पुरती सटकली ..

विजय साठे .. 
०९ / ०९ / २०१४ 



   

काव्यांकित शुभेच्छा .. 

दिवस आजचा, आनंदाचा, खरोखरी हा आहे ..
जन्मदिवस हा, खास व्यक्तीचा, कायम मनांत राहे ..

एक वेगळा स्नेही असा हा, निर्मळ असे मनाचा ..
एक मित्र तरी असा असावा, संग्रही प्रत्येकाच्या ..
मित्र मिळविण्या, असा कुणीही, प्रयत्न करुनी पाहे ..
जन्मदिवस हा, खास व्यक्तीचा, कायम मनांत राहे ..

जगत मित्र हा, प्रामाणिक ही, हवा हवासा वाटे ..
गुलाब पुष्पा, परी जरी हा, याला नसती काटे ..
सौजन्यही किती, या मित्राच्या, नसा नसांतुन वाहे ..
जन्मदिवस हा, खास व्यक्तीचा, कायम मनांत राहे ..

घटका गेल्या, पळेही गेली, वर्षे किती तरी सरली ..
सुखात जावो, या पुढली ही, जी दैवाने दिधली ..
शतायुषी हा, मित्र होऊ दे, आज "साठी" जो पाहे ..
जन्मदिवस हा, खास व्यक्तीचा, कायम मनांत राहे ..

दिवस आजचा, आनंदाचा, खरोखरी हा आहे ..
जन्मदिवस हा, खास व्यक्तीचा, कायम मनांत राहे ..

विजय साठे ..
०५ / ०९ / २०१४ 

सुहास्य वदना, गौरीनंदना ..

सुहास्य वदना, गौरीनंदना, सेवा माझी घे ..
सेवा माझी घे, मला तू, दर्शन लवकर दे ..

आतुर होऊन, वाट पाहतो, तुझी नित्य नेमाने ..
कधी तुझी रे, पडेल दृष्टी, मजवरती प्रेमाने ..
तनामनाने, तुझिया स्वाधीन, सेवा माझी घे ..
सेवा माझी घे, मला तू, दर्शन लवकर दे ..

वेळोवेळी, उच्चारण मी, करतो तव नामाचे ..
म्हणुन समजले, मजला आता, महत्त्व या सार्याचे ..
कर्ता ही तू, करविता ही तू, सेवा माझी घे ..
सेवा माझी घे, मला तू, दर्शन लवकर दे ..

तूच देसी रे, शक्ती मजला, जीवन हे जगताना ..
विविध अशा त्या, प्रसंगांस रे, सामोरे जाताना ..
असती तव जरी, आशिष जवळी, सेवा माझी घे ..
सेवा माझी घे, मला तू, दर्शन लवकर दे ..

सुहास्य वदना, गौरीनंदना, सेवा माझी घे ..
सेवा माझी घे, मला तू, दर्शन लवकर दे ..

विजय साठे ..
०३ / ०९ / २०१४ 

जासी तू परदेशी .. 

छकुल्या सोनूल्या रे, जासी तू परदेशी ..
किती दिवसां साठी तू, अंतर आम्हां देशी ..

काळ जरी छोटा तरी, सरणे अवघड आहे ..
थोडासा हा विचार, तू ही करूनी पाहे ..
इतका तरी वेळ आतां, आहे का तुजपाशी ..
किती दिवसां साठी तू, अंतर आम्हां देशी ..

हसत हसत जा बाळा, जिथे असे ठरलेले ..

असे स्वागतांस तिथे, तारांगण भरलेले ..

चन्द्रमा तुझा असेल, तिथे आता तुजपाशी .. 

किती दिवसां साठी तू, अंतर आम्हां देशी ..

कांहीं क्षण तुला तिथे, वेगळे जरा मिळतील .. 

सहजीवन तंत्राचे, धडे तुला तिथ कळतील ..

सारे नव अनुभव ते, जपुन ठेव तुजपाशी ..

किती दिवसां साठी तू, अंतर आम्हां देशी ..

झटकुन एकांत तुझा, फडफडु दे पंख आता .. 

सुखासीन तू व्हावी, संधी तुज ही मिळता ..

एक छान ही संधी, अशी आता तुजपाशी ..

किती दिवसां साठी तू, अंतर आम्हां देशी ..

छकुल्या सोनूल्या रे, जासी तू परदेशी ..
किती दिवसां साठी तू, अंतर आम्हां देशी ..

विजय साठे ..

२९ / ०८ / २०१४ 

  

  

शुभेच्छा ..

कष्ट संपले  तुझे,  दुःख ही सारी सरली ..
आनंदमयी वर्षं आता, केवळ ती उरली ..

चल आता सामोरे, जाऊ नविन पर्वाला ..
विसरून तो भूतकाल, आणि दुखद सर्वाला ..
एक नवीन ऊर्जा ही, आता अवतरली ..
आनंदमयी वर्षं आता, केवळ ती उरली ..

चल आता शोधूया, नवी वाट नविन दिशा ..
संकल्प नवे, विषय नवे, जोपासू नव आशा ..
आशा किती नवनवीन, मने त्यांनी भरली ..
आनंदमयी वर्षं आता, केवळ ती उरली ..

चल आता जोडीने, सहजीवन नेऊ पुढती ..
झेलू नवीन आव्हाने, सांसारिक जी येती ..
दुसरी इच्छा आता, कोणतीच ना उरली ..
आनंदमयी वर्षं आता, केवळ ती उरली ..

कष्ट संपले  तुझे,  दुःख ही सारी सरली ..
आनंदमयी वर्षं आता, केवळ ती उरली ..

विजय साठे ..
०१  / ०९ / २०१६  

वाजला, वाजला .. 

वाजला, वाजला, ढोल ताशा वाजला ..
बाप्पा मोरया गजर, गगनी निनादला ..

गौरीपुत्र दर वर्षी, मानाने येतो ..
येताना सवे संग, आनंदा वाहतो ..
दुर्मिळ खजिना त्याने, भक्तांवर उधळला ..
वाजला, वाजला, ढोल ताशा वाजला ..

वक्रतुंड कुणी म्हणती, कुणी एकदंत ..
बुद्धीची देवता ही, अतीव बुद्धिवंत ..
खरा भक्त जो त्याच्या, पाठीशी तो राहिला ..
वाजला वाजला, ढोल ताशा वाजला ..

दहा दिवस अनुभवतो, भक्तांची भक्ती ..
प्रामाणिक भक्ती जशी, पुरवी तो शक्ती ..
जो वागे विपरित तो, क्षणांमधे संपला ..
वाजला वाजला, ढोल ताशा वाजला ..

वाजला, वाजला, ढोल ताशा वाजला ..
बाप्पा मोरया गजर, गगनी निनादला ..

विजय साठे ..
२९ / ०८ / २०१४ 






  

स्वप्न पाहिली .. 

स्वप्न पाहिली किती तरी मी, कुणी तरी माझे ऐका रे ..
अपुऱ्या  माझ्या इच्छा कारण, खिशांत नाही पैका रे ..

कितीक वेळा वाटले मला सूट बूट मी घालावे ..
रुबाबात त्या इथे तिथे मी, स्वतःला जरा मिरवावे ..
सूट बूट घ्यावेसे वाटती कसे घेऊ ते सुचवा रे ..
अपुऱ्या  माझ्या इच्छा कारण, खिशांत नाही पैका रे ..

गळ्यांत माझ्या चेन असावी, ब्रसेलेट ही हातावरी ..
राडो दुसऱ्या हाती असावे, स्वप्न मनी हे लई भारी ..
कसे घडावे हे सारे या, उपाय मजला सुचवा रे ..
अपुऱ्या  माझ्या इच्छा कारण, खिशांत नाही पैका रे ..

कुटुंबास फिरण्या मी न्यावे, असे कांहीं से येई मनी ..
कुठे जाऊ मी कसा जाऊ मी, येत नाही हे मज ध्यानी ..
उत्तर या प्रश्नाचे देखील, लवकर कुणीही सुचवा रे ..
अपुऱ्या  माझ्या इच्छा कारण, खिशांत नाही पैका रे ..

विजय साठे .. 
२५ / ०८ / २०१४    

गीत यावे तव गळ्यातुंन ..

लेखणी दे गीत आणि, वाद्य देई संगीताला ..
गीत यावे तव गळ्यातुंन, म्हणती दोघे गायकाला ..

लेखणीला माहिती ना, कसे सुचती शब्द ते ..
वाद्य ही प्रसवे सुरांना, जे जसे कुणी छेड़ी ते ..
पाहिजे आता असा जो, मनोगत हे समजला ..
गीत यावे तव गळ्यातुंन, म्हणती दोघे गायकाला ..

वाहे कधी शब्दांतुनी, करुणा रसाच्या कावडी ..

तर कधी ते वाहती, आनंद मिश्रित रेवडी ..   

शब्द गंगा पाजुनी, शमवा कुणी त्या चातकाला .. 

गीत यावे तव गळ्यातुंन, म्हणती दोघे गायकाला ..

शौर्य ध्वनी कधी कानी येई, तर कधी त्या प्रेम लहरी ..
भक्ती सूर ही कांही वेळा, भूपाळी ही कधी प्रथम प्रहरी ..
ओतून वाद्यांतुन सुरांना, जागवा साऱ्या जगाला ..
गीत यावे तव गळ्यातुंन, म्हणती दोघे गायकाला ..

सरसावला गायक आता हा, पाहुनी, ऐकून सारे ..
म्हणे शब्दां अन सुरांना, सारे तुम्ही, साथीस या रे ..
एक अभिनव गीत गाण्या, गायक असे तो सिद्ध झाला ..
गीत यावे तव गळ्यातुंन, म्हणती दोघे गायकाला ..

लेखणी दे गीत आणि, वाद्य देई संगीताला ..
गीत यावे तव गळ्यातुंन, म्हणती दोघे गायकाला ..

विजय साठे ..
२१ / ०८ / २०१४ 

चांदणी 

आसमंत शांत शांत, किती किती हा एकांत,
अप्सराही लाजली ..
सवे रातीला घेऊन, मेघांना उलगडून,
चांदणी चमकली ..

चन्द्र कलेने  ढळला, रूपाने ओसरला,
काळोखी किती भरली ..
सवे रातीला घेऊन, मेघांना उलगडून,
चांदणी चमकली ..

दिशा काय समजेना, पायवाट गावसेना,
ती, ना अडखळली ..
सवे रातीला घेऊन, मेघांना उलगडून,
चांदणी चमकली ..

तारे असती अविचल, नक्षत्रे ही मलूल,
स्थिर जागी थांबली ..
सवे रातीला घेऊन, मेघांना उलगडून,
चांदणी चमकली ..

काळ्या पाठीवरती, उठून छान ती दिसती
चांदणी चिमुकली ..
सवे रातीला घेऊन, मेघांना उलगडून,
चांदणी चमकली ..  

विजय साठे ..
१८ / ०८ / २०१४  

   

दव बिन्दू ..   

पहाटेचा प्रहर नवा, घेऊन ये गारवा ..
टप टपता दव बिंदू, वाटतो हवा हवा ..

ओसंडे आनंदू, चोही कडे जाणवतो ..
गवतावर, पानांवर, सारीकडे पसरतो ..
नवा रोज तरी भासे, क्षण नी क्षण बरवा ..
टप टपता दव बिंदू, वाटतो हवा हवा ..

नयनांना जाणवते, तरीही ते कळते ..
स्पर्शाने काया कशी, भारावुन जाते ..
प्रचिती याची घ्यावी, कसे कधी ठरवा ..
टप टपता दवबिंदू, वाटतो हवा हवा ..

मोहविते स्वैर अशी, भटकंती पहाटे ..
आजु बाजू छान हवा, किती हलके वाटे ..
मंत्रमुग्ध होऊनिया, स्वतःलाच हरवा ..
टप टपता दव बिंदू, वाटतो हवा हवा ..

पहाटेचा प्रहर नवा, घेऊन ये गारवा ..
टप टपता दव बिंदू, वाटतो हवा हवा ..

विजय साठे ..
१८ / ०८ / २०१४